ಕಿಮ್ಸ್ ಮಗು ಪ್ರಕರಣ ! ಸತ್ಯಕ್ಕಾಗಿ ಬೆನ್ನಟ್ಟಿದ ಪೊಲೀಸರು
ಶಿಶು ಕಳ್ಳತನವಾಗಿರುವ ಪ್ರಕರಣದ ಬಗ್ಗೆ ಎಲ್ಲ ಆಯಾಮಗಳಿಂದ ತನಿಖೆ ನಡೆಸುತ್ತಿದ್ದೇವೆ. ಶೀಘ್ರ ಸತ್ಯಾಂಶ ಹೊರಬೀಳುವ ವಿಶ್ವಾಸ ಇದೆ. ಅದುವರೆಗೆ ನಿಖರವಾಗಿ ಏನನ್ನೂ ಹೇಳಲು ಆಗುವುದಿಲ್ಲ. ಲಾಭೂರಾಮ ಹು-ಧಾ ಪೊಲೀಸ್ ಆಯುಕ್ತ
ಹುಬ್ಬಳ್ಳಿ ಜೂನ್ 16: ಹುಬ್ಬಳ್ಳಿಯ ಕಿಮ್ಸ್ನಲ್ಲಿ ನವಜಾತ ಶಿಶು ಕಳ್ಳತನವಾಗಿದೆ ಎನ್ನುವ ವಿಚಾರ ದೊಡ್ಡ ಚರ್ಚೆಯಾಗುತ್ತಿದೆ. ಈ ಪ್ರಕರಣದ ತನಿಖೆಗೆ ಪೊಲೀಸರ ಮೂರು ವಿಶೇಷ ತಂಡವನ್ನು ರಚಿಸಲಾಗಿದೆ. ಪ್ರಕರಣ ಬೆನ್ನಟ್ಟಿ ಹೋದ ತಂಡಕ್ಕೆ ಬೇಲಿಯೇ ಎದ್ದು ಹೊಲ ಮೇಯ್ದಿದೆ ಎನ್ನುವುದು ಗೊತ್ತಾಗಿದೆ. ಈ ಪ್ರಕರಣ ಸೂತ್ರಧಾರಿ ಮತ್ತ್ಯಾರೂ ಅಲ್ಲ, ಮಗುವಿನ ತಾಯಿ ಸಲ್ಮಾ ಹುಸೇನ್ ಶೇಖ್!
ಸಲ್ಮಾ ಖುದ್ದಾಗಿ ಬಟ್ಟೆಯಲ್ಲಿ ಮಗುವನ್ನು ಸುತ್ತಿಕೊಂಡು ವಾರ್ಡ್ನಿಂದ ಹೊರಕ್ಕೆ ತೆಗೆದುಕೊಂಡು ಹೋಗಿದ್ದಾಳೆ. ಬರುವಾಗ ಕೈಯಲ್ಲಿ ಬಟ್ಟೆ ಮಾತ್ರ ಇರುವುದು ಸಿಸಿಟಿವಿ ಫೂಟೇಜ್ನಲ್ಲಿ ಸೆರೆಯಾಗಿದೆ. ಈ ಬಗ್ಗೆ ಪೊಲೀಸ್ ಮೂಲಗಳು ಖಚಿತ ಪಡಿಸಿವೆ. ಇದಕ್ಕೂ ಮುನ್ನಾ ಸಲ್ಮಾ ಹೇಳಿದ ಕಟ್ಟುಕಥೆ ಬೆಚ್ಚಿಬೀಳಿಸುವಂತಿದೆ.
ಕುಂದಗೋಳ ನೆಹರು ನಗರದ ಸಲ್ಮಾ ಹುಸೇನ್ ಶೇಖ್ 40 ದಿನದ ಕೂಸಿನೊಂದಿಗೆ ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ಬಂದಿದ್ದಳು. ಮಗುವಿನ ಮೆದುಳಿನಲ್ಲಿ ನೀರು ತುಂಬಿದೆ ಎನ್ನುವ ಕಾರಣಕ್ಕೆ ಆಸ್ಪತ್ರೆಯಲ್ಲಿ ದಾಖಲಿಸಿ ಚಿಕಿತ್ಸೆ ಆರಂಭಿಸಲಾಗುತ್ತೆ. “ಜೂನ್ 13ರಂದು ಮಧ್ಯಾಹ್ನ 12.30ರ ಸುಮಾರಿಗೆ ಮಗು ಅಳುತ್ತಿದೆ ಎನ್ನುವ ಕಾರಣಕ್ಕೆ ವಾರ್ಡ್ನಿಂದ ಹೊರಗಡೆ ಬಂದು ನಿಂತಿದ್ದೆ. ಆಗ ತನ್ನ ಮಡಿಲಲ್ಲಿದ್ದ ಮಗುವನ್ನು ವ್ಯಕ್ತಿಯೊಬ್ಬ ಕಿತ್ತುಕೊಂಡು ಪರಾರಿಯಾದ” ಎಂದು ಸಲ್ಮಾ ರಾದ್ಧಾಂತ ಎಬ್ಬಿಸಿದ್ದಳು. ಭದ್ರತಾ ಸಿಬ್ಬಂದಿ ಮಗುವನ್ನು ಹುಡುಕಲು ಆರಂಭಿಸಿದ್ದರು. ಸುದ್ದಿ ತಿಳಿದು ಪೊಲೀಸರೂ ಸಲ್ಮಾಳಿಂದ ಮಾಹಿತಿ ಪಡೆದು ಪ್ರಕರಣದ ತನಿಖೆಗಾಗಿ ಮಹಾನಗರ ಪೊಲೀಸ್ ಆಯುಕ್ತ ಲಾಭೂರಾಮ ಮೂರು ವಿಶೇಷ ತಂಡ ರಚಿಸಿದ್ದರು.
ಮಂಗಳವಾರ ಮಗು ಪತ್ತೆ: ಈ ವಿಚಾರ ತೀವ್ರ ಚರ್ಚೆಯಾಗುತ್ತಿದ್ದಂತೆ ಪೊಲೀಸರು ಕಿಮ್ಸ್ನ ಮೂಲೆ ಮೂಲೆ ಹುಡುಕಲು ಆರಂಭಿಸಿದ್ದರು. 300ಕ್ಕೂ ಹೆಚ್ಚು ಸಿಸಿ ಟಿವಿ ಕ್ಯಾಮರಾಗಳಿದ್ದು, ಅವುಗಳನ್ನೂ ಪರಿಶೀಲಿಸಿದ್ದರು. ಭದ್ರತಾ ಸಿಬ್ಬಂದಿ ಸೇರಿದಂತೆ ವಾರ್ಡ್ನಲ್ಲಿದ್ದ ಸಿಬ್ಬಂದಿಯನ್ನೂ ವಿಚಾರಣೆಗೆ ಒಳಪಡಿಸಿದ್ದರು. ಪೊಲೀಸ್ ತನಿಖೆ ಚುರುಕಾಗಿದ್ದೇ ತಡ ಜೂನ್ 14ರ ಬೆಳಗ್ಗೆ ಹೊತ್ತಿಗೆ ಕಳ್ಳತನವಾಗಿದ್ದ ಮಗು ಕಿಮ್ಸ್ನ ಪಿಎಂಎಸ್ಎಸ್ವೈ ಕಟ್ಟಡದ ಲಾನ್ನಲ್ಲಿ ಪತ್ತೆಯಾಗಿತ್ತು.
ಸಿಸಿಟಿವಿ ಫೂಟೇಜ್ನಲ್ಲಿ ಏನಿದೆ?: ಮಗು ಸಿಕ್ಕ ಬಳಿಕ ಪ್ರಕರಣ ಸುಖಾಂತ್ಯ ಕಂಡಿತು ಎಂದು ಎಲ್ಲರೂ ನಿಟ್ಟುಸಿರು ಬಿಟ್ಟರಾದರೂ ತನಿಖಾ ತಂಡ ಮಾತ್ರ ವಿರಮಿಸಿಲ್ಲ. ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾದ ದೃಶ್ಯವನ್ನು ಸೂಕ್ಷ್ಮವಾಗಿ ಗಮನಿಸಿದ್ದರು. ಇದರಲ್ಲಿ ಸೋಮವಾರ ಸ್ವತಃ ಸಲ್ಮಾ ಮಗುವನ್ನು ವಾರ್ಡ್ನಿಂದ ಹೊರಗೆ ಕರೆದುಕೊಂಡು ಹೋಗಿದ್ದು ಗೊತ್ತಾಯಿತು. ವಾರ್ಡ್ಗೆ ವಾಪಸ್ ಬರುವಾಗ ಬಟ್ಟೆಯಷ್ಟೇ ಕೈಯಲ್ಲಿ ಇತ್ತು. ಪರಿಣಾಮ ಸಲ್ಮಾ ಹೇಳಿದ್ದು, ನಕಲಿ ಕಹಾನಿ ಎನ್ನುವುದು ಪೊಲೀಸರಿಗೆ ಗೊತ್ತಾಯಿತು. ಆಕೆಯನ್ನು ವಿಚಾರಣೆಗೆ ಒಳಪಡಿಸಿದಾಗ ವಾರ್ಡ್ ಮೇಲಿಂದ ಕೆಳಗೆ ಮಗುವನ್ನು ಬಿಸಾಕಿದ್ದಾಗಿ ಸಲ್ಮಾ ಹೇಳುತ್ತಾಳೆ. ಆದರೆ, ಸಲ್ಮಾ ಹೇಳಿದ ಮತ್ತೊಂದು ಕಟ್ಟುಕಥೆಯನ್ನು ಪೊಲೀಸರು ಕೇಳಲು ಸಿದ್ಧರಿರಲಿಲ್ಲ. ಏಕೆಂದರೆ ವಾರ್ಡ್ನಿಂದ ಎಸೆದಿದ್ದೇ ಆದಲ್ಲಿ ಮಗು ಬದುಕುಳಿಯಲು ಸಾಧ್ಯವೇ ಇಲ್ಲ. ಅಷ್ಟಕ್ಕೂ ಮಗುವನ್ನು ಏಕೆ ಎಸೆದೆ? ಎಂದು ಪೊಲೀಸರು ಪ್ರಶ್ನಿಸಿದರೆ, ಸಲ್ಮಾ ಉತ್ತರ ನೀಡಲಿಲ್ಲ. ಸಲ್ಮಾ ಏಕೆ ಈ ಕಟ್ಟುಕಥೆ ರೂಪಿಸಿದಳು? ಮಗು ಆಕೆಗೆ ಬೇಡವಾಗಿತ್ತೇ? ಅಥವಾ ಮಾರಾಟಕ್ಕೆ ಸ್ವತಃ ಮುಂದಾಗಿದ್ದಳೇ? ಎಂಬಿತ್ಯಾದಿ ಸಂಗತಿಗಳು ಇನ್ನೂ ನಿಗೂಢವಾಗಿವೆ.
ಮಗು ಇಟ್ಟು ಹೋದವನು ಯಾರು?: ಜೂನ್ 14ರಂದು ಬೆಳಗ್ಗೆ ಕಿಮ್ಸ್ನ ಪಿಎಂಎಸ್ಎಸ್ವೈ ಕಟ್ಟಡದ ಲಾನ್ನಲ್ಲಿ ಮಗುವನ್ನು ವ್ಯಕ್ತಿಯೊಬ್ಬ ಇಟ್ಟು ಹೋಗಿರುವುದೂ ಸಿಸಿಟಿವಿಯಲ್ಲಿ ಸೆರೆಯಾಗಿದೆ ಎನ್ನಲಾಗಿದೆ. ಈ ವ್ಯಕ್ತಿ ಯಾರು? ಎನ್ನುವ ಮಾಹಿತಿಯನ್ನು ಪೊಲೀಸರು ಕಲೆ ಹಾಕುತ್ತಿದ್ದಾರೆ. ಸಲ್ಮಾಳಿಗೆ ಸಂಪೂರ್ಣ ಮಾಹಿತಿ ಇದ್ದರೂ ಆಕೆ ವಿಚಾರಣೆಗೆ ಸಹಕರಿಸುತ್ತಿಲ್ಲ. ಕೂಲಂಕುಶ ತನಿಖೆ ಬಳಿಕವೇ ಅಸಲಿ ಕಹಾನಿ ಹೊರಬರಲಿದೆ.